7. maj 2002

UPA2002/28

 

A a l l a n n g u u t i s s a t u t s i u n n e r s u u t

uunga

Ulluunerani meeqqeriviit, ulluunerani angerlarsimaffimmi paaqqinniffiit il.il. pillugit Inatsisartut peqqussutissaattut siunnersuut.

 

Aappassaanneerinninnissamut Naalakkersuisunit saqqummiunneqartoq.

 

§ 1-imut

1. Paragraffi ima oqaasertalerneqassaaq:
"§ 1. Kommunalbestyrelsi pisussaavoq meeqqanut 15-it inorlugit ukiulinnut paarineqarnissamik sunngiffimmiluunniit isumaginninnikkut perorsaanermik tunngaveqartumik pisariaqartitsisunut, ilanngullugit paarineqarnissamik pisariaqartitsinermik tunngaveqanngikkaluartumik pinaveersimatitsinissamillu siunertaqartumik sammisassaqartinneqarnissamik pisariaqartitsisunut ulluunerani meeqqerivinni inissanik pisariaqartunik qulakkeerinnissalluni.
Imm. 2. Kommunalbestyrelsi aammattaaq meeqqanut atualertussanut tamanut, atuarfitsialammut piareersarluarnissamut atatillugu siunniussanik siuarsaasunik sammisassanik neqerooruteqassaaq."

 

Paragraffi nutaaq

2. Paragraffi ima oqaasertalerneqassaaq:
"§ 01. Ulluunerani neqeroorutit § 1-imi taaneqartut siunertarivaat meeqqat inuusuttullu ineriartornerisa sapinngisamik pitsaanerpaamik tapersersorneqarnissaat periarfissinneqarnissaallu.
Imm. 2. Ulluunerani neqeroorutini ataasiakkaani perorsaanermi suliassatut siunertat sinaakkutissallu kommunalbestyrelsip akuerissavai, taakkulu suliarineqassapput angajoqqaat peqatigalugit paaseqatigalugillu:
1) Meeqqanik inuusuttunillu angerlarsimaffiup perorsaanera tapersersornialugu.
2) Nukappiaqqat niviarsiaqqallu tamatigoortumik ineriartornerat siuarsarniarlugu, tassuuna meeqqap inooqataanermini nukittorsarnissaa, inuttullu naleqassusiata attatiinnarnissaa periarfissillugu.
3) Meeqqap inerikkiartornera, peqqissusaa, pilersitsisinnaanermut piginnaasai pisinnaasaalu sammisaqartitsinikkut siuarsarniarlugit, meeqqap takorluuisinnaaneranut, pilersitsisinnaaneranut oqaatsimigullu inerikkiartorneranut kajumissaaqataasunik.
4) Meeqqap misigissutsikkut atugai nukittorsarniarlugit, taamaalilluni meeqqap pitsaasumik toqqissisimasumillu alliartornissaa tapersersorlugu.
5) Akisussaaffeqarneq, ataatsimoorneq peqatigiinnissarlu ilinniartinniarlugit, taamaalilluni aalajangeeqataasinnaatitaanermik, akisussaaqataanermik naammineersinnaanermillu meeqqap ilikkarnissaa periarfissillugu.

 

Paragraffi nutaaq

3. § 5 -ip kingorna paragraffi nutaatut ikunneqassaaq:

"Aningaasalersuineq

§ 02. Inatsisartut peqqussutaat manna malillugu ulluunerani meeqqerivinnut, ulluunerani angerlarsimaffimmi paaqqinniffinnut il.il. aningaasartuutit kommuninit akilerneqartassapput.
Imm. 2. Meeqqeriviit sananerinut aningaasartuutinut Namminersornerullutik Oqartussat tapiissuteqarsinnaapput."

 

§ 7-imut

4. Imm. 1 ima oqaasertalerneqassaaq:
"§ 7. Inatsisartut peqqussutaat manna 1. januar 2003-imiit atortuutilerpoq."

 

 

Nassuiaatit nalinginnaasut

2001-mi ukiakkut Inatsisartut ataatsimiinneranni siunnersuutip siullermeerneqarnerani arlalinnit ujartorneqarpoq ulluunnerani meeqqeriviit, ulluunerani angerlarsimaffimmi paaqqinniffiit il.il. pillugit Inatsisartut peqqussutaani siunertassatut aalajangersagaqartariaqartoq.

Taamatut kissaateqarneq akuersaarumallugu siunnersuutigineqarpoq § 1 –mi oqaasertaliussat allannguuteqassasut aammalu nutaamik § 2-iliortoqassasoq.

Siunertassatut aalajangersakkamik siunnersuut tusarniaassutigineqarsimavoq KANUKOKA-mut, PIP-mut, IMAK-imut aamma ulluunnerani meeqqeriviit ataasiakkaat, taamatullu atuarfitsialammut piareersarluarnissamut atatillugu suleqatigiinni eqqartorneqarsimalluni.

Tusarniaanermi akissuteqartoqarsimanngilaq.

Ilanngullugu maluginiaqquneqarpoq Meeqqat pisinnaatitaaffii pillugit Naalagaaffiit Peqatigiit isumaqatigiissutaanni tunngaviusunut siunnersuut naapertuummat. Tamatuma nassataraa meeqqat inuusuttullu namminneq isummersornissaminnik ikiorneqassasut, inuttullu nammineersinnaasutut inerikkiartorneranni tapersersorneqassallutik. Meeqqat ulluunnerani meeqqerivinnik atorluaanissaminnik pisinnaatitaanerat tamatuma aamma nassataraa.

 

Aalajangersakkanut ataasiakkaanut nassuiaatit

Nr. 1-imut

Aalajangersagaq peqqussutip atuuttup § 29-ata assigipajaarpaa.

Taamaattoq ukiunut killigititaasoq allanngortinneqarpoq, neqeroorutit meeqqanut 15-it inorlugit ukiulinnut tunngasuunerat peqqussummi erseqqinnerulersinneqarluni. Ulluunerani meeqqeriviit tassaasinnaapput meeraaqqeriviit, meeqqeriviit sunngiffimmilu meeqqeriviit.

Inissat pisariaqartinneqartut amerlassusissaannik aalajangersakkap ulluunerani inissanik pisariaqartinneqartunik neqerooruteqarnissamik kommuni pisussaaffilerpaa. Inissat qanoq amerlatigisut pilersinneqassanersut kommunip nammineerluni missiliuisarpoq. Missiliuussinermi pingaartitat arlaqartut ilanngunneqarsinnaapput, tassunga ilaallutik neqeroorutaasinnaasut, ulluunerani meeqqerivimmi inissamik maannakkorpiaq pisariaqartitsineq pisariaqartitsilernissamullu missingersuineq kiisalu aningaasaqarnermut tunngasut. Inissanik pilersitsinermi tamanna pillugu oqartussaasunit malittarisassatut aalajangersagaasinnaasut malinneqassapput.

Imm. 2-imi aalajangersagaq malillugu meeqqanut atualertussanut tamanut atualernissamut piareersarnissamik neqerooruteqarnissamik kommunalbestyrelsi pisussaaffeqarpoq.

Meeqqerivitsialattut suliap ineriartornerata ilaatut atuarfitsialallu pillugu oqallinneq qularnanngitsumik ataqatigiimmata, kommunalbestyrelsi inuiaqatigiinnut pilersaarusiornerminut atatillugu atualertussanut ulluunerani meeqqerivimmi atuisuunngitsunut piukkunnarsaatinik sungiusaatinik neqerooruteqarnermigut periarfissiisariaqarpoq. Siunniutaavoq meeqqat tamarmik atualernissamut piareersarnissaminut periarfissaqartariaqartut, apeqqutaatinnagu meeraq meeqqerivimi atuisuunersoq atuisuunnginnersorluunniit. Angajoqqaat kajumissusaat malillugu akeqanngitsumillu taamatut neqerooruteqartoqartariaqarpoq. Ataqatigiissaarinissamut allaffissornikkut suliakkersuutaalaartussaavoq. Meeqqeriviup kommunimi atualertussanut pilersaarusiornerani sinaakkutissat pioreersut iluini eqaatsumik kommunalbestyrelsi neqeroorutinik aqqissuussisinnaasariaqarpoq.

Kommunit ilaanni misissuisarneq atorneqarpoq, taaguutilik AtualernissamutPiareersimanermiMisissuineq - SPU. Meeraq qanoq atualernissaminut piareersimatigineranik naliliinnissamut taamatut misissuisarneq atorneqarsinnaavoq. Misissuisarnermik atuinermi meeqqat arlallit pakatsinissaat pinaveersaartinneqarsinnaavoq, taammaattumik kommunini tamani atorneqarnissaa naleqquppoq, imalluunniit kommuninit eqqumaffigineqarluni atorneqarsinnaasoq.

Peqqussutip ilitsersuutitassaani atuarfitsialammut piareersarluarnissaq immikkoortutut allaaserineqarumaarpoq.

Nr. 2-imut

Aalajangersakkami uani siunertaavoq nalorninaallisissallugu ulluunerani meeqqerivinni perorsaanermi sinaakkutissat siunertallu kommunalbestyrelsimit kommunimi oqartussani qullersaasutut akuerineqassasut. Ulluunerani meeqqerivinni ataasiakkaani perorsaanermi siunertat sinaakkutissallu meeqqerivinni ataasiakkaani aqutsisut angajoqqaat peqatigalugit suliarisussaassavaat. Assigiiaanik naligiikkannertumik kommunip neqerooruteqarnissaa kommunalbestyrelsip akuersisussaarneratigut qulakkeerneqassaaq.

Pkt. 1 – 5–mi siunertanik tulleriiaarisimaneq pingaarnersiuinermik takutitsisuunngilaq, isumaat tamarmik assigiimmik pingaaruteqartutut isigisariaqarlutik. Siunertat taakkua ulluunerani paaqqinnittarfinni tunaartassaq, siulersugaaneq ingerlatitaanerlu pillugit kaajallaasitaq nr. 176-mi pioreerput, kisiannili imarisaasa peqqussummut nuunnerisigut kommunit ulluunerani meeqqerivinnik pilersitsinerini ingerlatsinerinilu pingaartinneqarnerulissapput.

Angajoqqaat meeqqaminnik perorsarnissaq isumaginninnissarlu akisussaaffigaat, taammaattumik pingaaruteqarpoq naqissusissallugu ulluunerani neqeroorutit angerlarsimaffiup meeqqamut perorsaaneranut tapertaaginnartussaammat.

Meeqqap immikkut pisariaqartitai tunngavigalugit nukappiaqqat niviarsiaqqallu tamatigoortumik ineriartornerannik meeqqeriviit siuarsaasariaqaraluarput, taammaalilluni meeqqap inooqataanermini periarfissai nakussassarneqarlutik, aamma meeqqap tarnikkut timikkullu naleqassusiata attatiinnarnissaa periarfissillugu.

Meeqqap inuttut naleqassusianut inuulluarnissaanullu sapinngisamik ajunnginnerpaamik ulluunerani meeqqeriviit assigisaallu sunneeqataanerat, meeqqap alliartornerani angajoqqaat perorsaanerannut isumaginninnerannullu tapertaassaaq.

Taamatuttaaq misigissutsikkut nukissaqarluarneq ineriartornissamut ingerlalluarnissamullu aamma toqqissisimanerup attatiinnarnissaanut inoqatinullu tatiginnissinnaasuseqarnissaanut meqqamut inuusuttumullu nakooqutaassussaavoq.

Meeqqap pissusilersornermini inunnut allanut ataatsimoortukkuutaanullu peqataasinnaanissaamut akisussaaffeqarpalaarnermik ilinniarnera ulluunnerani neqeroorummut angajoqqaallu meeqqamut perorsaaneranut isumaginninneranullu tapertaasunut pissusissamisoortutut ilaavoq.

Nr. 3 –imut

 

Aalajangersaq meeqqanik inuusuttunillu ikiorsiisarneq pillugu inatsisartut peqqussutaat nr. 9. 30. Oktober 1992 –meersumit § 48 –imi aalajangersakkamik ingerlateqqiinneruvoq.

Isumaginnittoqarfiup aqunneqarnera aaqissuussaaneralu pillugit Inatsisartut peqqussutaanni taannalu tunngavigalugu isumaginninnermi sanaartukkanik ineriartortitsinissaq pillugu kaajallaasitaq nr. 213 –ikkut ulluunnerani meeqqeriviit il.il. sananerinut tapiissuteqartarnissaq inatsisitigut tunngavissaqareerpoq. Meeqqeriviit il.il. pillugit inatsisartut peqqussutissaattut siunnersuutip saqqummiunneqarnerani suliassaqarfik taanna allannguuteqanngilaq.

Namminersornerullutik Oqartussat meeqqerivinnik ingerlatsinermut tapiissuteqarsinnaanerannik aalajangersagaq tamatumuuna ilanngunneqanngilaq. Oqaaseqatigiit atuuttut paatsoorneqartarsimapput, kommunit ataasiakkaat isumaqarsimagamik aalajangersakkamut tassunga innersuussillutik ulluunerani meeqqerivinnik ingerlatsinermut aningaasanit immikkoortitanit tapiiffigineqarnissaminnik qinnuteqarsinnaallutik. Tamanna aalajangersakkami siunertaasimanngilluinnarpoq, tassami ulluunerani meeqqerivinnik ingerlatisinermut tapiissutit kommuninut ataatsimoortumik tapiissutini ilaareermata. Tamanna maannamut suleriaasiusimasumut aammalu Namminersornerullutik Oqartussat KANUKOKA-llu tamatuminnga nammaqatigiinnissamik suliassanillu agguataarinninnissamik isumaqatigiissutaannut naapertuuppoq.

Nr. 4-imut

Siunnersuutip siullermeerneqarnerani siunnersuutigineqarpoq Inatsisartut peqqussutaat 1. januar 2002-mi atuutilissasoq. Tamanna ulluliunneqarsimasoq allanngortinneqarpoq 2002 –mi upernaakkut Inatsisartut ataatsimiineranni aappassaaneernissaa pingajussaanneernisaallu pissutigalugu.